here I am now.. and I miss you all so much

hey mini liebe
es git viu z verzeue. am beschte dueni eifach vo vore aafo... auso, am fritti am morge bini mit mire familie und em schaetzeli uf zueri a flughafe gfahre. es ischmr irgendwie geng no nid bewusst gsi dass ig iz wuerklech furt go fuer nes ganzes johr, waeg vo au mine liebe und vo mim schatz... dr abschid am flughafe isch sehr schwaer und sehr truurig gsi und i ha no dr ganz waeg bis zum flugzueg eifach muesse graenne. am liebschte waeri eifach umkehrt und zu mim schatz gange... es si no ganz vueu angeri ustuschschueeler doert gsi wo ou aui uf australie si gange. mit dene hanis naer uf dr ganze reis sehr guet gha, und das isch ou super gsi. ufem flug vo zueri nach kuala lumpur bini naeb eire ghocket wo ou e fruend het und das het mr grad guet to, mit ihre chli ueber das z rede. i bi so truurig gsi... z kuala lumpur simer naer nach 12 stung flug glandet und mir si aui vou ufr schnure gsi. s het gloub chuum oepper choenne schlofe. am flughafe heimer 4 stung ufenthaut gha und de simer e chli go umeluege und hei chli wasser woeue choufe. aber nei, mir hei usserd gucci, versace und dior laede rein gar nuet gfunge! ungloublech... es isch so warm gsi doert und mir si aui so ustrochnet gsi vo dere trochne flugzuegkabineluft, und de heimer naer eine gfrogt und dae het gmeint me choenni ir apothek wasser choufe. zum glueck het das naer ou gstumme. witer isches du naer gange mitem flueger nach sydney. z kuala lumpur am flughafe heimer ues scho vo nes paar ustuschschueeler muesse verabschide, wueu die nach perth und angeri orte si witergfloge. dr zwoeit flug isch die hoelle gsi, chame so saege, eiach nomou 8 stung und so richtig muehsam. i ha zwar dasmou chli choenne schlofe, aber es isch trotzdaem nid so toll gsi. uf dr ganze reis hani so guet wie nuet choenne aesse, i ha eifach nuet abebrocht. i bi so ufgwueut gsi und es isch so vueu i mir inne abgange.. i hami chuum choenne froeie, i bi eifach nume truurig gsi und ha mini liebe und vorauem mi schatz so fescht vermisst...
bevor mr naer in sydney si glandet si si im flugzueg mit so desinfektions-sprays duere gloffe und hei das zueg id luft gsprayt :) i ha eifach nume muesse lache wueu das so komisch het usgseh und irgendwie ou chli sinnlos isch :) auso jo, australie het drum angst vor seuchen und drum dueesi sones gschiss ablo ueberau :) z sydney am flughafe heimer ues naer widr vo nes paarne muesse verabschide, die si drum witer nach brisbane gfloge. auso simer nume no z 4. gsi und si naer use gange. doert simer aui scho erwartet worde vo uesne familiene. i bi ganz haerzlech empfange worde, si heimi grad umarmt und heimer es muentschi ufd backe gae und i hami grad sofort wou gfueut bi ihne. mir hei naer 2,5 stung muesse heifahre nach valentine. i ha im outo chli choenne schlofe und mir si naer so am 11i ir nacht deheime acho. i ha grad mire familie und mim schatzi agluete und ne bscheid gae dass i guet bi acho. und de bini grad widr gnz fescht truurig worde und waer am liebschte eifach grad widr ufe flughafe, um dr noechscht flug fuer hei z nae. am noechschte tag hani bis am 4i am nomittag gschlofe und bi geng no mued gsi... nachere warme duschi hani mou mis zueg uspackt und mi chli iigrichtet, und i bi geng no ganz fescht truurig gsi. am obe heimer naer grilliert, es het ganz vueu fleisch, ganz weni gmuees, ganz weni salat und ganz weni riis gae, aber s isch super gsi :) und i ha sowieso fasch nuet moege aesse. d denise, mini gastmueter, dr jack, mi gastvater, d brodie und dr jacob, mini gastgschwueschterti und d jenna, am jacob sini fruendin, si aui do gsi und es isch naer ganz schoen und gmuetlech worde. i hane mini gschaenkli gae und si hei fescht froeid gha dranne, vorauem am schoggi :);) und de heimer naer no so ne art geo-spiu gmacht, eifach uf englisch, und i bi gar nid mou so schlaecht gsi :) auso i ha zwar scho verlore, aber nume knapp :)
naer hani no mitem schatz skypet u de ischsmr grad besser gange. me isch nang haut scho vueu noecher weme nang cha ghoere UND gseh... mir hei oeppe 3 stung lang gredt und das isch ganz schoen gsi. i bi oeppe am 2 am morge ids bett und ha bis am 6i nid choenne pfuse! cheibe jetlag... i ha sogar no dr wecker vom jacob am morge ghoert wueu i denn no bi wach gsi... naer hani aber oeppe bis am 1 am nomi choenne pfuse.
iz bini dr ganz tag alleini deheime und chami no chli usruhie. das isch no guet. i ha vori gseh dass si e toeff hei :) das isch jo dr hammer :) i cha sicher mou mit hinge druf hocke und chli go toeff fahre ;) usserdaem heisi vou e schoene pool mit integriertem whirlpool! es soeu so schnaeu wie mueglech warm waerde, so dass i de ou no chli dri cha go schwadere bevor i mues familie waechsle ;) i ha drum erfahre dass i insgesamt 4 familie wirde ha, und i 3 monet wirdeni scho familie waechsle. aber das fingeni sehr guet, so abwaechslig isch super.
s hus woni drinn wohne isch eistoeckig und so zimmlech laenglech. i ha nes haerzigs zimmer mitemne schoen breite bett. s einzige wo i mim zimmer faeut isch es pout... es het ou suesch irgendwie niene es pout... :)
wasi gester ha muesse feststeue isch, dass australie aeuae eifach e fernsehnation isch, und iz chani mr ou erklaere wiso d angela geng so vueu fernseh gluegt het bi ues. die hei eifach dr ganz tag meh odr weniger eifach fernseh gluegt! guet, es isch ou sunnti gsi, aber jo, s waetter isch no schoen gsi und mir deheime goe meischtens use wes schoens waetter isch.
uh aber s isch so chaut hie unge! si hei jo winter und si duee d hueser nid heize, si hei nume so nes chlises oefeli im wohnzimmer (wit vo mim bett entfaernt) und das hautet vilech e umkreis vo 2 meter chli warm. auso i ha bis iz immer chaut gha. i wirde mi aber aeuae no dra gwoehne. und bis i mi dra gwoehnt ha wirds de scho widr warm ;)
iz hani cheibe viu gseit... i wuesst no meh aber i due de das es angers mou brichte. i hoffe es geit oeich aune guet und dir gniesset s summerwaetter ir schwiz! i froeie mi vo oeich z ghoere!
u i vermissenech...........
bis gli, bis zum noechschte maeuder. oeiches livi